| " Nag " deur THEO WASSENAAR [boodskap #73028] |
Sun, 02 February 2003 16:12 |
|
|
Oorspronklik gepos deur: @rogers.com
Theo Wassenaar
Nag
Die klein blink ogies van die groot swart nag
Staar my so stil aandagtig aan vanaand;
Hul glimlag net so effentjies en sag,
Asof hul reeds my diepste wens verstaan't.
Ek voel dat daar 'n band onsegbaar teer
Die groot heelal tot een geheel verbind,
Dat daar 'n gees wat ewig is regeer,
Voor wie die skepping klein voel soos 'n kind.
'n Onbegrepe wêreld sonder sin
Sou hierdie lewe wees vir hom wat in
Homself alleen 'n siel en wese vind:
'n Vreemde tussen wesens doof en blind.
Geluk in volheid word in hom gewek
Wat hom in alles, die Al in hom ontdek.
|
|
|
|
] 
Supertaal
Blog
Soek
Hulp
Lede
Registreer
Teken aan
Tuis
